Vatn og avløp - tilkopling
Beskrivelse
Du må søkje kommunen om tilknyting til det kommunale offentlege vass- og avløpsanlegget. Dette gjeld både for nye byggjetiltak og dersom du har fått pålegg om tilknyting etter plan- og bygningslova. Du som abonnent er sjølv ansvarleg for at ditt private vass- og avløpsanlegg er i forskriftsmessig stand. Til ditt private anlegg høyrer stikkleidningar og utstyr på utsida av husveggen som skal knytast til det offentlege anlegget.
Kommunen pliktar å gi informasjon innan rimeleg tid ved planlagde stopp i vassforsyninga eller avløpshandteringa, eller dersom det skjer vesentlege endringar i vasstrykk eller vasskvalitet.
Du kan forvente at:
- drikkevatnet skal oppfylle visse krav til kvalitet (sjå drikkevatnforskrifta)
- vasstrykket skal vere minst 2 bar ved tilknytingspunktet på den kommunale vassleidninga.
Under periodar med vassmangel eller når andre forhold krev det, kan kommunen innføre restriksjonar på vassforbruk til spesielle formål, til dømes hagevatning.
Målgruppe
- Innehavar av eigedom med vass- og/eller avløpsinstallasjonar som er tilknytta det offentlege vass- og avløpsanlegget.
- Innehavar av eigedom med vass- og/eller avløpsinstallasjonar som har fått pålegg om tilknyting etter plan- og bygningslova.
Vilkår
For tilknyting til offentleg vass- og avløpsanlegg gjeld standard abonnementsvilkår (administrative og tekniske føresegner) som kommunen har vedteke. Desse føresegnene gjeld uavhengig av om abonnenten har skrive under ei fråsegn om å rette seg etter vilkåra eller ikkje.
Ved svikt i vasstilførsla eller i avløpssystemet, herunder også tilbakeslag frå offentleg avløpsanlegg, er kommunen berre ansvarleg der svikten skuldast forsettlege eller uaktsame forhold frå kommunen si side.
Kommunen kan kreve anlegg reparerte, utbetra, omlagde eller fjerna dersom dei er i strid med abonnementsvilkåra eller med plan- og bygningslova.
Lover
Forskrift om krav til byggverk (TEK), Kap. 9 - Sanitæranlegg
Forskrift om krav til byggverk (TEK), Kap. 11 - Vannforsyning- og avløpsanlegg
Lov om kommunale vass- og kloakkavgifter
Forurensningsforskriften, Kap. 16. Kommunale vann- og avløpsgebyrer
Sakshandsaming
I tillegg til nødvendige søknader i samsvar med plan- og bygningslova skal kommunen, som eigar av vass- og avløpsanlegga, ha søknad om tilknyting til offentlege vass- og avløpsanlegg. Søknadsskjema får ein hos kommunen. Søknad om tilknyting skal underskrivast av abonnenten og godkjent føretak. Søknaden skal vere godkjend før arbeidet blir sett i gong, med mindre kommunen tillet noko anna.
Kommunen kan også krevje at andre enn abonnenten, herunder leigetakarar, festarar osb., skriv under slik søknad.
Dersom eit arbeid under utføring blir overdradd til eit anna godkjent føretak, skal det sendast ny søknad. For eit arbeid som ikkje er starta opp innan tre år etter at løyve er gitt, fell godkjenninga bort. Godkjent føretak skal sørgje for at det ligg føre situasjonsplan som viser privat vass- og avløpsanlegg (slik det er bygd) så snart anlegget er ferdig. Situasjonsplanen skal sendast kommunen for oppbevaring.
Kommunen kan når som helst, og utan førehandsvarsel, kontrollere/sjå over sanitærinstallasjonar og private vass- og avløpsanlegg som er under utføring. Kontrolløren skal utan oppfordring legitimere seg. Kommunen kan gi pålegg om reparasjon, utbetring og eventuell omlegging dersom installasjonane ikkje er i samsvar med abonnementsvilkåra.
Vass- og avløpsanlegg er underlagt eit omfattande regelverk som det er viktig å følgje og ha kjennskap til. Plan- og bygningslova, med teknisk forskrift (TEK), gir rammeføresegnene for planlegging og utforming av sanitærinstallasjonar og vass- og avløpsanlegg. I tillegg kjem enkelte lover med tilhøyrande forskrifter som er viktige for vass- og avløpsabonnentane i den enkelte kommunen.
Klage
Ved klage på søknader som fell inn under reglane i plan- og bygningslova, og som endar i eit enkeltvedtak, gjeld følgjande:
- Fristen for å klage er tre veker frå du mottok vedtaket.
- I klaga gjer du greie for kva du vil ha endra og grunngjer dette. Kommunen kan gje rettleiing ved behov.
- Send klaga til den instansen som fatta vedtaket. Dei vil vurdere om det er grunn til å gjere endringar. Dersom vedtaket ikkje vert endra, blir klaga sendt vidare til kommunen sin eigen klageinstans, eller til Fylkesmannen i dei høve dette er klageinstansen.
- Du vil motta informasjon om klagebehandlinga når saka er ferdig.
Klage på vasskvalitet eller -trykk
Dersom det er manglar ved vasskvaliteten eller -trykket, kan abonnenten etter nærare reglar krevje avslag i pris og/eller erstatning etter forbrukerkjøpslova
Klage på abonnementvilkår og gebyr:
Normalt vil det ikkje vere høve til å klage til ein overordna instans. Ved usemje om abonnementvilkåra kan det reisast sivilt søksmål for domstolane.