Allemannsretten
Beskrivelse
Allemannsretten er retten til fri ferdsel og opphald i utmark. Allemannsretten er utgangspunktet for det enkle og tradisjonelle, ikkje-motoriserte friluftslivet. Retten til å gå fotturar i skog og fjell, gå på ski i marka om vinteren, sykle, ake og ri på stiar og vegar.
Allemannsretten er nedfeld i friluftslova, og byggjer på respekt for miljøverdiar, eigarar og andre brukarar. Retten til fri ferdsel og opphald gjeld i utgangspunktet berre i utmark og på dyrka jord når marka er frosen og snødekt.
Utmark
Utmark er udyrka mark. Skog, fjell, myr, lynghei, holmar og skjær.
Innmark
Innmark er all dyrka jord. Innmark er også gardsplass, hustomt og industriareal.
Vilkår
- Alle kan ferdast til fots i utmark heile året når det skjer omsynsfullt og med tilbørleg varsemd.
- Alle kan ferdast med ride- eller kløvhest, kjelke, tråsykkel eller liknande på veg eller sti i utmark og over alt i utmark på fjellet, så sant ikkje kommunen med samtykke av eigaren eller brukaren har forbode slik ferdsel på nærmare tilviste strekningar. Kommunen sitt vedtak må stadfestast av fylkesmannen.
- Du kan ferdast til fots i innmark når marka er frosen eller snølagd, men ikkje i perioden 30. april til 14. oktober (dette gjeld ikkje gardsplass, inngjerda hage og liknande).
- Du kan bade frå strand i utmark eller frå båt når det skjer i rimeleg avstand frå bufast hus eller hytte.
- Du kan dra i land båt på strand i utmark for ei kortare tid, men ikkje nytte kai eller brygge utan løyve frå eigaren.
- Du kan ikkje raste eller overnatte i innmark utan at du har samtykke frå eigaren.
- I utmark kan du raste der du vil. Overnatting under open himmel eller telting er tillatt i utmark, men ikkje nærmare enn 150 meter fra bufast hus eller hytte. Skal du liggje meir enn to døgn på same staden, må grunneigaren gi løyve. Utan samtykke frå grunneigaren kan du likevel telte når dette skjer langt frå hus og på høgfjellet.